كان "عمر بن عبد العزيز" يقول: اللهم إن لم أكن أهلا لأن أبلغ رحمتك فإن رحمتك أهل

أن تبلغني فإن رحمتك وسعت كل شيء وأنا شيء فلتسعني رحمتك يا أرحم الراحمين

أأأأأأمـــــــيـــــــــــــــن

كان سائق سيارة نصف نقل يحمل أقفاص فراخ ينقلها من الهرم للعباسية كما يفعل كل يوم فأوقفه كمين مرور كي يطبِّق علي الصبح قانون المرور الجديد وسأل السيد اللواء الواقف في نصف الشارع سائق نصف النقل: أنت محمل إيه؟
فرد عليه السائق: فراخ.
فسأله اللواء: أنت بتأكل الفراخ دي إيه؟
استغرب السائق السؤال لكنه جاوب: بأكل الفراخ اللي بتاكله الفراخ، القمح والحبوب والذرة.
فرد اللواء سريعًا: لا دي مخالفة لتعليمات قانون المرور الجديد تدفع غرامة مائة جنيه، دفعها السائق مندهشًا ثم واصل سيره حتي قابلته لجنة مرور أخري في شارع صلاح سالم والغريب أن السيد العقيد سأله نفس السؤال: أنت بتأكل الفراخ دي إيه؟ لم يفهم ما سر اهتمام القانون بأكل الفراخ لكنه جاوب مستفيدًا من درس الغرامة التي دفعها فقال: بأكل الفراخ لانشون وبسطرمة وجبنة رومي فرد العقيد بمنتهي الجدية: لا دي مخالفة لتعليمات قانون المرور الجديد تدفع غرامة ثلاثمائة جنيه، ذهل السائق لكنه مجبرًا ومضطرا دفع وأكمل طريقه حتي أوقفه كمين مرور ثالث في مدخل العباسية والمصيبة إن السيد المقدم سأله نفس السؤال: أنت بتأكل الفراخ دي إيه؟، بسرعة شديدة أجاب السائق: يا أفندم أنا باسلم كل فرخة جوز جنيهان الصبح وهي بقي تاكل علي كيف أمها!! إذا لم تكن قد عرفت حتي الآن فهذه نكتة.. ولكنها تشرح المأساة!

اعلان

أنا في أجازه لغايه يوم عيد ميلادي

أقبل رجل إلى إبراهيم بن أدهم .. فقال : يا شيخ .. إن نفسي .. تدفعني إلى المعاصي .. فعظني موعظة
فقال له إبراهيم : إذا دعتك نفسك إلى معصية الله فاعصه .. ولا بأس عليك .. ولكن لي إليك خمسة شروط
قال الرجل : هاتها
قال إبراهيم : إذا أردت أن تعصي الله فاختبئ في مكان لا يراك الله فيه
فقال الرجل : سبحان الله ..كيف أختفي عنه ..وهو لا تخفى عليه خافية
فقال إبراهيم : سبحان الله .. أما تستحي أن تعصي الله وهو يراك
فسكت الرجل .. ثم قال : زدني
فقال إبراهيم : إذا أردت أن تعصي الله .. فلا تعصه فوق أرضه
فقال الرجل : سبحان الله .. وأين أذهب .. وكل ما في الكون له
فقال إبراهيم : أما تستحي أن تعصي الله .. وتسكن فوق أرضه ؟
قال الرجل : زدني
فقال إبراهيم : إذا أردت أن تعصي الله .. فلا تأكل من رزقه
فقال الرجل : سبحان الله .. وكيف أعيش .. وكل النعم من عنده
فقال إبراهيم : أما تستحي أن تعصي الله .. وهو يطعمك ويسقيك .. ويحفظ عليك قوتك ؟
قال الرجل : زدني
فقال إبراهيم : فإذا عصيت الله .. ثم جاءتك الملائكة لتسوقك إلى النار .. فلا تذهب معهم
فقال الرجل : سبحان الله .. وهل لي قوة عليهم .. إنما يسوقونني سوقاً
فقال إبراهيم : فإذا قرأت ذنوبك في صحيفتك .. فأنكر أن تكون فعلتها
فقال الرجل : سبحان الله .. فأين الكرام الكاتبون .. والملائكة الحافظون .. والشهود الناطقون .. ثم بكى الرجل .. ومضى .. وهو يقول : أين الكرام الكاتبون .. والملائكة الحافظون .. والشهود

بلد شهادات صحيح

وسع يا جدع أمتحانات الثانويه وصلت البيوت خلاص و معدش ورانا لمده شهرين غير أمتحانات الثانويه و النتيجه و التنسيق

بجد الفتره دي كل سنه كوميديا سوداء مش موجوده في أي حته في العالم وأحنا اللي حاطينا نفسنا في الموضوع ده قبل الحكومه متجبرنا علي دا يعني احنا اللي روحنل للهم بريجلينا

أكيد الطلبه بتيشتكي من جدول الأمتحانات و الوزاره بتتكلم عن جدول تاني ولما تبدأ الأمتحانات نسمع عن الأسئله الخارقه اللي بتفرق بين الطالب اللي فاهم و اللي مش فاهم -طيب يا تري اللي فاهم ده فاهم ايه؟- والجديد السنه دي علي المسلسل بتاع الأمتحانات هو حكايه الأمتحانات المتسربه وطبعا الموضوع ده مينفعش أي حد يعلق عليع لأنه مهزله بكل المقاييس

أما المنظر اللي لازم تشوفه قدام كل مدرسه في الفتره دي هو الأهالي اللي واقفه علي أعصابها هما كان الله في عونهم صارفين دم قلبهم علشان الواد يطلع دكتور أو مهندس يعني لو طلع غير كده الدنيا هتقف

وطبعا العناوين الرئيسيه للجرايد و برامج التلفزيون برده بتتكلم عن الثانويه

وبعد الأمتحانات و النتيجه تظهر كل واحد ناقص بيبقي عاوز يعيد تصحيح الورقه بتاعته علشان هو شايف أنه مظلوم والحكومه كتر خيرها بتسمح بدا بس المراجعه بتكون في اعاده جمع الدرجات أما لو في سؤال متصحح غلط لازم قضيه و كدا الحكومه تبقي خرت تاني وبعد كده التنسيق يبان و الواد يترمي في أي كليه و يبقي عاطل بعد أربع أو سبع سنين حسب الكليه اللي هو دخلها أو يشتغل حاجه ملهاش دعوه بالدراسه بس الزاي ده أحنا بلد شهادات صحيح علي رأي عادل أمام كنت هنسي الحكايه دي

السنه الجايه و اللي بعدها و اللي بعد بعدها هكتب نفس الكلام ده لو كنت من لسه من أهل الدنيا

كلمه حق للأهلي

فيجو انتقل من برشلونه الى ريال مدريد عدوه اللدود بدون دوشة زي ما بتعملوا دلوقتى. اوين رجع من اسبانيا على نيوكاسل منافس ليفربول ومع ذلك محصلش دوشة زي ما بتعملوا

الاسماعيلي اشترى اسلام الشاطر من الاتحاد وباعه لفرقة سعودية واشتراه الزمالك ومحدش اتكلم ولما اتنفل الاهلي بقى الاهلي سرقة ازاي معرفش مع انه فالاصل مش اسمعلاوي

و بركات من حديد سوهاج وراح فرق خليجية وبعدين راح الاهلي والكل قال عليه صفقة فاشلة ولما نجح بقى الاهلي سرقة

النحاس كان في اسوان وبعدين الاتحاد اشتراه وبعدين الاسماعيلي وحتى ده الاسماعيلي باعه لفرقة سعودية والاهلي اشتراه ولما راح الكل اتكلم

أحمد فتحي الاسماعيلي باعه ليونايتد شيفيلد وبعدين الاهلي اشتراه يعنى مش كان عندكوا

والاخر حسنى عبدربة اللى كان أداره الأسماعيلي بتتكاسل في تسديد فلوس دفعاته والزمالك دخل في العرض بس الراجل اختار الاهلي والاسماعلاوية عملوا نعش وراحوا له قدام بيته عايزين الراجل يعمل اية غير الخوف من البلطجية على عيلته

ونبص بقى على لاعيبة الاسماعيلي عمرو فهيم وعبدالحميد بسيونى جابوا له الدوري مع انهم مش من الاسماعيلي اصلا ده اسمه احتراف والاهلي سرقة

احمد سمير فرج المدافع الايسر للاسماعيلي اللى اصلا ناشئ من الاهلي وراح فرنسا وبعدين الاهلي وبعدين الاسماعيلي ده احتراف و الاهلي سرقة

هاني سعيد ناشئ من الاهلي احترف في اوروبا وبعدين المصري وبعدين الاسماعيلي وبقى عمود فقري في خط ضهر الاسماعيلي دة اسمه احترف للاسماعيلي و سرقة للاهلي

محمد فضل هداف الاسماعيلي اللى هو ناشئ اهلاوي رجع من رحلة احتراف على فرق محلية وبعدين الاسماعيلي وبقى عمود فقري في هجومة ده يبقى اسمه احتراف للاسماعيلي وسرقة للاهلي

واخيرا وليس اخرا مفاوضات مع وائل شيتوس و قناوي للانتقال للاسماعيلي بقى دة اسمه احتراف للاسماعيلي وسرقة للاهلي

بينما هولمان مدرب الاهلي لما طلبه الاسماعيلي والزمالك خطفة منه بقى اسمه احتراف و الاهلي لو عمل كده سرقة

مش شايفين بعد كل ده ان في ناس بتبالغ شوية في انفعالاتها و أنا منهم أحيانا ولا اية رايكم وبعدين البلد فيها مشاكل اكبر من حسنى عبدربة والاسماعيلي و الأهلي و الزمالك والكورة كلها

في مشكلة لقمة العيش؛ السكن؛ المواصلات؛ الاكل؛ الشرب؛ الصحة والعلاج الدنيا كلها قايمة على راسنا والناس بتبص على حاجات تافهه المفروض تبصوا عليها لما تكون اصلا فاضين او مفيش وراكوا حاجة

أنا آسف معاليك

أنا أعرف أن في مسئول بيكدب علي الناس ويقولهم معلومات مغلوطه أقل من الموجود علشان ياخد نصيبه من الفساد

و مسئول تاني بيقول المعلومات اللي عنده للناس علشان مايضحكش عليهم

أما معالي الوزير سامح فهمي فكل يوم يطلع علينا ويقول عندنا دهب و حديد بترول وكمان غاز طبيعي أحمدك يا رب بس المشكله أني عمر ما شوفت حاجه من اللي قالها

و ده بيخلي الناس عندها جشع

ده الراجل أول لما قال أن عندنا دهب كل الناس كانت عاوزه تاخد حقها في الدهب اللي بيقولوا عليه

نكته بايخه

يقال أن جورج بوش دعى توني بلير على الغداء وبعد الغداء

خرجا للصحفيين للإدلاء بتصريح صحفي
سئلهم أحد الصحفين ..ماهي القرارات التي اتخذتموها أثناء اجتماعكم .. ؟؟
قال الرئيس بوش : قررنا أن نقتل 20 مليون مسلم و دكتور أسنان واحد..؟؟؟
.الصحفيين إندهشوا طبعا ونظروا إلى بعضهم البعض
والكل متلهف لمعرفة ...... لماذاطبيب أسنان واحد فقط .....؟؟؟؟؟؟؟
فقال أحد الصحفيين للرئيس بوش : ولماذا طبيب أسنان واحد؟؟
تبسم بوش....ثم مال على توني في أذنه .ألم أقل لك إن أحداً لن يهتم بالـ 20 مليون مسلم

انتهت النكته ..........هل ضحكتم ...؟؟؟؟

ايه أول حاجه حد فكر فيها أكيد هيه أشمعنا دكتور أسنان ؟سيبنا الكارثه و بصينا علي الحاجه التافهه

الواد ده جامد موت

الكليب ده في حاجه محصلتش من أيام السادات بس بجد الواد ده جامد و بجد ربنا يسترها معاه لأن ط ريقه مسدود مسدود مسدود يا ولدي بس كسبت أحترامك لنفسك

قله أدب

الخبرده مستفز أوي لازم الدمايطه يوافقوا يا سلام هو أنت مش عارف من الأول أضرار المصنع و خطورته و لا لما الموضوع أتفضح ان فيه سمسره كلوا عاوز يطلع نفسه

معني موافقت الريس علي نقل المصنع من دمياط هو دليل علي ضعف الموقف الحكومي و كدبهم لما كانوا بيقولوا أن المصنع مش مضر أمال هتنقلوا ليه

طيب ليه المصنع اتحط في دمياط بالذات؟ سؤال لولبي بس اجابته سهله و هي أن المصنع محتاج غاز طبيعي علشان بشغل المصنع و محتاج رصيف في الميناء و محتاج مياه عذبه علشان بتدخل في عمليه التصنيع و محتاج مكان يصرف فيه المخلفات دي

و دمياط هي المكان المثالي اللي فيه كل ده علشان كده ليه يبنوا المصنع في مكان تاني لسه هيجهزوا و ياخد و قت و الفلوس اللي لسا هتدفع علشان توصل الغاز الطبيعي و المياه العزبه وعمليه النقل من و الي الميناء تروح للحكومه ونوفر الوقت و كلوا هيستفيد و يتحرق الشعب

نظريه

الحكومه دلوقتي محطوطه في ورطه و هي اتساع الفجوه بين طبقه الأغنياء و الفقراء وطبعا الطبقه المتوسطه خلصت من زمان و الحل للمشكله دي هو اعاده توزيع الثروه و طبعا ده استحاله يحصل علشان كده الحكومه سهلت الفساد و نشرته علشان الموظف الغلبان يأخد من الغني فلوس علشان يخلصله المصلحه و بكده تبقي الحكومه بتعيد التوزيع من غير متزعل حد

صباح الطيابه

الناس مش بتسيب الناس في حالها

من المواقف اللي بتحصلي كتير لما حد يكون بيخلصلي مصلحه و خاصه في لجنه امتحان الشفوي لما الدكتور يسألني عن اسمي وأقوله محمد الأدهم دايما ببقي مستني أسمع رد من الأتنين يا حد يقولي ، أدهم الشرقاوي أو يقولي عادل أدهم يبقالك ايه و خصوصا ان أبويا أسمه عادل يعني الباب مفتوح علي البحري للأستظراف و المشكله اني ببقي مستني أسمع التعليق ده لأنه لو معملش كده الفضول مش هيسيبه في حاله

لا تعليق

الرأي العام

كل واحد فينا ليه رأيه الخاص بيه و وجهه نظره في كل المواضيع اللي بتعدي عليه في حياته؛و وجهه النظر دي بتكون نتيجه العادات والتقاليد اللي اتربي عليه أو من نازع ديني أو حتي ارتياح نفسي

و طبيعي جدا انك علي طول تلاقي أراء معارضه لرأيك

أما الرأي العام ده بيبقي نتيجه ان واحد من الناس قال رأيه في موضوع مطروح علي الساحهو يشترط في الشخص ده انه يكون موثوق فيه و في أراءه و مع مرور الوقت يبدأ الناس يقتنعوا بأي حاجه يقولها الرجل ده

و أوضح مثال علي كده هو ان معظم المصريين كانوا بيثقوا في وعود الحكومه و كانوا بيقتنعوا ان البلد بتتطور لأنهم كانوا بيسمعوا الكلام ده من وجهه نظر الحكومه في الأخبار علي الأولي و التانيه لكن مع انتشار الفضائيات بدأ الناس يفقدو الثقه في الحكومه و صدقوا المعارضه اللي بتتكلم بلسانهم أو المعارضه اللي هما فاكرينها بتتكلم بلسانهم؛ولا حد فاهم حاجه

و الحكايه دي بتفكرني أيام مكنت ضغير و كنت أتخبط في حاجه وتكون الخبطه صعبه يقوم كل اللي حوليا يضحكواعلشان يقنعوني ان الحاجه دي هي اللي المفروض تعيط مش أنا؛علشان أنا اللي وجعتها و أني بطل و طبعا كنت بصدق

كنت أهبل مش كده

علل:الشيخ الشعراوي وصل لقلوب كل الناس؟

سؤال غبي أنا عارف بس بجد هو ليه الشيخ الشعراوي من الشيوخ القليلين اللي أجمع الناس كلها علي محبته و محدش هاجمه قبل كده و اتهمه

أما اليومين دول كل شويه يطلع شيخ أو داعيه من الأخوان أو السلفين -علشان هما المحتكرين الدين في الوقت الحالي-بيبقي هو و الشيوخ اللي متفقين معاه في التفكير هما اللي فاهمين الدين صح و الناس التانين مش فاهمين حاجه لأ دول كمان مش بيطبقوه صح

أما الشيخ الشعراوي الناس كلها كانت بتحبه و عمرها ما صنفته مع دول و لا دول

انما اليومين دول تيجي تسئل أي حد فيهم عن توجهه الديني يقوم يرد بالأجابه العبقريه اللي فيها الخلاصه و يقولك دول ودول حلوين بس أنا مش تبع حد أنا تبع كلمه لا اله الا الله -نورتم المحكمه الله يفتح دماغك- وأي حد من الشيوخ الحلوين دول لو كان تعب نفسه في التفكير شويه كان عرف سبب حب و شعبيه الشيخ الشعراوي رحمه الله و ساعتها كان ممكن يستفيد و يلم الناس حوليه و ياخد الثواب و الناس مكنتش هتتشتت بالكل ده

ربنا يهدي

حكايه اننا ندعي ربنا علشان نبقي دوله ديموقراطيه و يبقي عندنا عدل وحريه؛ حوار فاشل مش علشان أي حاجه انما لأن الديموقراطيه والحريه مش صلاه استسقاء و لا دعوه مظلوم لأننا احنا اللي ظلمنا نفسنا من زمان علشان شايفين الفساد ومبنواجهوش ونمنعه؛ وسيدنا رسول الله عليه أفضل الصلاه والسلام بيقول من رأي منكم منكرا فليغيره؛ بس ولا تفرق معانا يابا أحنا ودن من طين و التانيه من عجين وقشطه علي كده و علي رأي المثل أبعد عن الشر و غنيله -وطبعا الشر ده هو البهدله اللي الواحد غالبا هيشوفها لو فكر يقول لأ- بس لو موقفناش قدام الفساد مهما كانت العواقب و الخساير نبقي عمرنا ماهنشوف الديموقراطيه ولا هنشم ريحتها

سؤال مالوش أي لزمه

أنا كنت عاوز أعرف تفسير منطقي عن عدم مشاركه الأخوان في الاضراب

و أكيد السبب مش هيكون أنهم بيعرسوا للحكومه

وأكيد مش علشان مش هما اللي عملينها

طيب يا تري السبب ايه ؟

لعل المانع خير

هتفكر في ايه لو كنت مكانه

الصوره دي عجبتي أوي من ساعت مشفتها معرفش ليه بس تخيلت لو أنا مكان الرجل ده كنت هبقي بفكر في ايه؟

NO COMMENT

مين هو المثقف؟

من الحاجات اللي بسمعها علي طول هي أنت مثقف و الكلمه دي بسمعها من أي حد يشوفني بقرا الجرايد -طبعا الجرايد المستقله - أو بسمع الجزيره

السؤال المهم هو يعني ايه مثقف و ايه هي الثقافه؟

الثقافة هي موقف يتبناه الانسان يعبر عن مدي وعيه الفكري ووجهة نظر يتبناها في القضايا التي تثار حوله

و معني كده أن المثقف هو صاحب وجهه نظر يدافع عنها وينشرها في المجتمع من أجل المصلحه العامه

زي الفل بس برضوا مش عارف أطلع بمعني محدد للمثقف

أنــــــــــــا ؟ ؟ ؟ ؟

أنــــا لم و لن أحب أي انسان أو انسانـه

أكتر من الأنسان اللي موجود معايا دايما

و مقدرش أكدب عليه ومقدرش أشتغله

لأنه يشاركني في كل حاجه

انه ...... أنا

لو لم أكن مصريا لوددت أن أكون مصريا

الجمله البريئه دي اللي قالها مصطفي كامل و كان قصده أنه يعبر بيها عن حبه لمصر و مدي فخره بأنتمائه ليها و بعد كل السنين دي الناس كلها بدأت تهاجم المقوله دي

مصطفي كامل من حقه يجامل بلده بالطريقه اللي هو عاوزها -زي أي واحد بيقول أن أبوه أحسن أب في الدنيا أكيد دي وجهه نظره اللي مش من حق حد يعترض عليها- أما السبب في الهجوم و السخريه من الجمله دي هي أن الناس في مصر معدوش حاسين بأنتماء لبلدهم ولا أمان والسبب في ده الوضع الحالي للبلد فمفيش عندنا لا تعليم ولا صحه ولا أقتصاد قوي ولا حريه تعبير ولا انتخابات نزيهه ولا أي ميزه تخلي ال80مليون اللي عايشين في مصر محظوظين عن باقي سكان العالم اننا عايشين فيها و هما لأ

تخاريف

أحنا أحفاد الفراعنه و أحنا التاريخ وأحنا كمان اللي نقلنا الكوبري

لو لاحظنا حياتنا و حياه اللي حوالينا هنلاقي الكتير من المتناقضات و ده معناه اننا عندنا شيزوفرينيا يعني انفصام في الشخصيه و ده مرض نفسي و المثله علي كلامي كتير ومنها

أحنا شعب يميل للتدين بس الحمد لله ولا نعرف ربنا في التعاملات بين الناس وبعضها لأأن التدين عند كتير من الناس هو الحفاظ علي الصلاه و العبادات

ومثال تاني الحاله الأقتصاديه عند معظم المصريين تحت خط الفقر المعترف بيه دوليا و علي الرغم من كده بنصرف فلوس كتير أوي علي الرفاهيات زي الكلام في التليفون لدرجه أن بقي عندنا 3شبكات للمحمول وهيبقي عندنا شركه تانيه للتليفون الأرضي خلال شهور

و لو أتكلمنا علي البؤس و الهم اللي موجود عند المصريين هنلاقي أنه المنطقي أنه معندوش وقت يفرح من كتر المشاكل و علي الرغم من كده الأبتسامه مش بتفارق وشنا اللي أنا شايف أن الأبتسامه دي هي سخريه من القدر

و لو دورنا أكتر هنلاقي تناقضات أكتر

ربنا يسترها معانا

لأ يا حمساويه

حركه المقاومه الأسلاميه حماس مع كامل احترامي ليها لوقوفها أمام العدو الأسرائيلي مع العلم أني أختلف معاهم فكرا ومضمونا

كانوا الأول بيقاوموا و خلاص و مش معترفين بالكيان الاسرائيلي زي الفدائين اللي كانوا في مصر بس انهم يخشوا انتخابات الجالس النيابيه مفيش مشكله مع ان ملهاش لزمه أما أنهم كونوا حكومه و بالتالي أصبحوا مطالبين بالتعامل مع اسرائيل علي أنها دوله و ده علشان التفاقيات اللي قبل كده اللي مينفعش أنهم يلغوها في يوم و ليله علشان كده الدنيا تتقلب علي دماغهم

وكده بتوع حماس بقي عندهم انفصام في الشخصيه يعني مش معرفين بأسرائيل كجماعه و معترفين بيها كدوله و هما حكومه صباح الدلع

بعد كده قامت عاركه -ملعوبه- بين حماس وفتح وقام عمك أبو مازن الي هو فتحاوي بحل الوزاره و طبعا الحمساويه معجبهمش الكلام قاموا مولعين الدنيا و قامت الحرب بين الفلسطينين و أسرائيل قعده بتتفرج وفي الأخر قامت حماس واخده غزه ومستقليه بيها علشان تحكمها أحسن من مفيش

الكارثه الكبيره أنهم جابوا الخراب لغزه أكتر من الأول ووخلت الغزاويه مش لقين ياكللوا نتيجه اللي عامله أسرائيل أنتقاما من حماس

و بعد كده يقوم الناس الحلويين يقولوا أن اللي عملتوا حماس ده عين العقل لأن قاده فتح عملاء

طيب يعني اللي عندنا ملايكه بس أكيد مش هرضا أن يطلع علينا ناس يستقلوا بمحافظه عندنا في مصر بحجه أن الرئيس فاسد

صباح التخريف

رب ضارة نافعه

يمكن الحادثه بتاعه الصحراوي اللي مات فيها 23 من قوات الأمن المركزي أول مره نتعامل معاهم علي أنهم بني ادمين من لحم ودم بيموتوا وليهم أهل و حياتهم زي أي واحد

و امكن وزاره الداخليه أول مره تتعامل معاهم علي انهم بني ادمين لما ماتوا فأكيد هتصرف لأهاليهم فلوس

و طبعا سبب احساس الكراهيه اللي عند الناس هو احتكاك المجندين من الأمن المركزي معانا في المظاهرات وغيرها مع أنهم أغلب ناس وهم بينفذوا الأوامر من غير ما يكون عندهم الحق في الأعتراض

الأعجاز العلمي في القرأن

حكايه الأعجاز العلمي في القران محدش يقدر يتكلم فيها بس فيه حبة تساؤلات بتدور في دماغ الواحد ممكن تكون غلط

المفروض ان أي نظريه في الدنيا بنفضل نطبقها لحد ما تجي نظريه تانيه بتثبت عكس الكلام اللي أثبتته النظريه الأولي

والسبب في ده هو تطور أدوات البحث والتكنولوجيا وغيرها من الأسباب اللي ناتجه عن التطور الزمني

علشان كده أن شايف ان من الغلط اننا نربط بعض الحقائق العلميه بالقرأن و في حاله أن النظريه طلعت غلط محدش هيرحمنا و يقول ان الغلط في اللي ربط الموضوع ببعضه انما هيقولوا ان الغلط في القرأن و كده هنحط نفسنا في دوامه ملهش لزمه

وبتهيألي ان المقتنع بالأسلام مش محتاج تربطله القرأن بحقائق علميه علشان تقنعه

والله أعلم دي مجرد فكره لعبت في دماغي

الحب

يعني ايه حب؟هو ان اتنين يبقي بينهم ارتباط لا شعوري فالواحد مع الطرف التاني يحس بارتياح نفسي

وطبعا كلمه حب دي ممكن تبقي بين الواحد وأي حد مع ربنا أو الرسول أو أهلك أو حتي بنت زميلتك أو حتي بلدك

فالواحد اللي بيحب بيحس بارتياح وهو بيعبده وبيتقرب ليه و بيحس برضا ربنا عليه والرضا ناتج من الحب

و الواحد اللي بيحب الرسول و يعمل سنته هيشتشعر ان الرسول لو كان موجود كان هيبقي فخور بيه وبيحبه

الواحد لما تبقي علاقته قويه بأهله و بيحس انهم كل حاجه ومن غيرهم ولا حاجه _اه هو ليه شخضيته و حياته المستقله_ بس هيحس بالحنان و الترابط الموجود ومدي خوف اهله عليه و ده اسمه حب

و حب البنت اللي هتبقي في يوم شريكه حياتك و بير أسرارك أكيد هتبقي مرتاح لها علشان كده انت اخترتها من وسط كل البنات

و الحب الصعب هو حبك لبلدك أو أنك تحسه و هو ده احساس الأنتماء للبلد مع انك ممكن تكون واخد فيها بالجزمه القديمه و طالع عين أهلك بس برده بتحس انها بلدك

وطبعا دي وجهه نظري

منظر يجيب الشلل

أكتر حاجه بتضايقني و بحس ساعتها اننا شعب معفن هي اني أقلاقي أكوام الزباله في جنب الشارع أو علي الناصيه وفجأه المكان بيتحول لمقلب زباله

وطبعا الغلط في الحاله دي راكب المجلس المحلي بتاع المنطقه دي من ساسه لراسه علشان موفرش صندوق زباله في المنطقه دي اه المفروض ان الواحد يدور علي أقرب صندوق ويرمي فيه بس الواحد بيبقي شايل كيس الزباله ومتكدر وهاين عليه يرميه قبل ما يشيله

أما اني قلاقي أكوام الزباله جنب الصناديق فدي مش حاجه تخنق بس دي حاجه تجيب الشلل؟وهنا السؤال اللولبي هم المصريين بيحبوا يكونوا معفنين؟

وبعد برهه من التفكير لقيت ان السبب ممكن يكون ان صناديق الزباله عليا والعيال الصغيره الي غالبا بترمي الزباله ما بتطلش فبتحط الباله في أي حته والسلام أما الناصحين اللي فيهم بيحاولوا يرموا في الصندوق يا أما يجي في الصندوق أو يقع جنبه وطبعا هو كتر خيره

أما الراجل الشحط اللي بيرمي جنب الصندوق فده غالبا بيخاف ليكون في قطه في الصنوق فتتطلع مره واحده والبون يتخض ويقطع الخلف و طبعا ساعتها حكايه النضافه تبقي جت عليه خساره ومش أي خساره

أنا شايف ان الموضوع ده ممكن يتحل بسهوله وهي ان عمو اللي بيعمل الصناديق الكبيره يعمل اتنين حجم اصغر من نفس الخامات و نحط الاتنين جنب بعض وفي الحاله دي يبقي الحكومه كتر خيرها

l

حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!

حاجه فرن بلدي

ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك وأذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال

سيبني أكل عيش ياعم

علي طول كنت بسمع كلمه خلينا ناكل عيش الجمله العقيمه اللي ملهاش أي معني

هو اللي بيتكلم في أحوال البلد اللي هو عايش فيها و اللي مفروض يحبها مينفعش ياكل عيش مش فاهم ايه التعارض في الحكايه دي و اشمعنا اكل عيش ليه متبقاش لحمه وأهو تبقي حاجه مفيده أو حتي بسبوسه يعني حاجه حلوه تخلي الواحد ممكن يفكر ينفض

ده احنا شعب حلو أوي لما نقرر نكون سلبيين نرضي بأقل حاجه

وكمان العيش اللي احنا رضينا بيه هما مرضوش يخلونا ناكله

دلوقي رغيف العيش المدعم علشان تجيبه تضيع نص يومك ونص طاقتك في الخناق مع اللي واقفين في الطابور و لو انت حالتك حلوه يبقي هتاكل العيش أبو ربع جنيه الرغيف و في الحاله دي يبقي هتتعشي لوحدك باتنين جنيه عيش علشان يدوب يقضيك أصل حاله بقي يصعب علي الكافر يارب ييجي اليوم و الحكومه تحس بيه

شفتوا بقي حكايه خلينا ناكل عيش جت علينا بخساره ازاي

لا أكلنا العيش و لا أخدنا حقوقنا اللي سبناها مقابل رغيف العيش